Bible Reader



1

1Kotoma ageunet abu Edeke kosub akuj ka akwap. 2Ido ajai akwap atai, komam etiakak; kojai amuton kokuju kaidules; kintkum emoyo loka Edeke kuju akipi.

3Kobala Edeke ebe, “Kojau aica”; kosodi aica ajaun. 4Koany Edeke aica ebe ejokuna; kotiak Edeke aica ka amuton. 5Komaik Edeke aica Apaaran, ka amuton da komaik Akuar. Kojau atiboŋ kojau da atupuruc, ŋin ŋes apaaran nasodit.

6Kobala Edeke ebe, “Kojau apak kidiŋ kakipi, kotiakite akipi ka akipi.” 7Kosub Edeke apak, kotiak akipi nuajaas kwap kapak, ka akipi nuajaas kuju kapak: kojau kwaŋin. 8Komaik Edeke apak Akuj. Kojau atiboŋ kojau da atupuruc, ŋin ŋes apaaran nakiareit.

9Kobala Edeke ebe, “Kotukonokinos akip nuejaas kwap kakuj aibois adiopet, kotakan neeonit.” Kojau kwaŋin. 10Komaik Edeke neeonit Akwap: ka atukon nuka akipi da komaik Aŋololin: koany Edeke ebe ejokuka. 11Kobala Edeke ebe, “Kobwaŋ akwap anya, koraata ikui icok, kora ekitoi loka araito araito koponeke, nuejaas icokokec, kotoma akwap.” Kojaas kwaŋin. 12Kobwaŋ akwap anya, koraata ikui icok koponekec, ka ekitoi da loerai araito nuejaas icokokec, kotoma oponeke. Koany Edeke ebe ejokuka. 13Kojau atiboŋ kojau da atupuruc, ŋin ŋes apaaran nakiwuniet.

14Kobala Edeke ebe, “Kojaut luecaete kapak naka akuj aitiak apaaran ka akuar: koraut kesi aanyuneta, kanuka apakio, ido kanuka apaarasia, ka ikar: 15Kojaas kesi kanuka aica toma apak naka akuj, acaanakin akwap.” Kojau kwaŋin. 16Kosub Edeke luecaete iarei luepolok; aica naepol adepar ayait apaaran, ka aica naepol ayait akuar; kosub aacer da. 17Kibwaik Edeke kes apak naka akuj acaanakin akwap, 18ayait da apaaran ka akuar, ido aitiak aica ka amuton: koany Edeke ebe ejokuka. 19Kojau atiboŋ kojau da atupuruc, ŋin ŋes apaaran nakiwoŋonet.

20Kobala Edeke ebe, “Kilweka akip lueliatos luipu luejaas aijar, ido koporitos akweny kokuju kakwap toma apak naka akuj.” 21Kosub Edeke itiaŋ lueiliilete luka aŋololin, ka iboro kere lukajarak luelosete, lukilwekete akip, koponesiokec, ka ŋinibore kere yeneporitoi yeneja abebenoka koponeke; koany Edeke ebe ejokuka. 22Kisirereŋ Edeke kes, kotema atiar, “Kouriaros, kipuaros, kilelebunos akipi nuejaas toma aŋololin, kipuaros da lueporitos kakwap.” 23Kojau atiboŋ kojau da atupuruc, ŋin ŋes apaaran nakikanyet.

24Kobala Edeke ebe, “Kilwek akwap ŋinibore yenejai aijar kotoma oponeke, ibaren, ka yeneliat, ka etiaŋ loka akwap koponeke.” Kojau kwaŋin. 25Kosub Edeke etiaŋ loka akwap koponeke, ka ibaren koponekec, ka ŋinibore yeneliat kakwap koponeke: koany Edeke ebe ejokuka.

26Kobala Edeke ebe, “Kasubutu ituŋanan kotoma aputowok, asimawok: kainakis kes ayait lukecor, ka akweny nuka apak, ka ibaren, ka akwap kere, ka ŋinibore kere yeneliat kakwap.” 27Kosub Edeke ituŋanan kaputoke, kaputo naka Edeke ŋes asubunia; kosub kes yenikiliokit ka yeniberu. 28Kisirereŋ Edeke kes: kotema Edeke kes atiar, “Kouriaros kipuaros, kilelebunos akwap, kiruma; koyaitos lukecor, ka akweny nuka apak, ka ŋinibore kere yenejari yeneliat kakwap.” 29Kobala Edeke ebe, “Koany, kainakis ikui kere lueraete icok luejaas akwap kere, ka ŋolikitoi loejaas araito nuka ekitoi loerai icok, araun inyamat kamakus: 30Ka ŋolitiaŋ kere loka akwap, ka akweny kere nuka apak, ka yeneliat kere kotoma akwap yenejai apuru naka aijar, ainakinit kes ikui kere luelibete araun inyamat.” Kojau kwaŋin. 31Koany Edeke ŋinibore kere yenikesubi, ido koany, ejokuna noi. Kojau atiboŋ kojau da atupuruc, ŋin ŋes apaaran nakikanyetekape.